|
تامام پروفسور زهتابینین سئونلری بوجور کیتابلارین چیخماسینا گؤزده قولاقدادیلار. پروفسور زهتابی نین شعرلری بیر یئره ییغیشیب و بیر مجموعه ده ایشیق اوزو گؤروبدور شعرلرین چوخو تورکجه دیر و نئچه سبک ده یازیلیبلار. کیتابدا شعرلردن سونرا بیرپارا خاطیره و حیکایه لر ده واردیر. بو شعرلرین هامیسی اینقیلاب دان قاباق و او زامان کی اوستاد اؤز شهریندن اوزاق و غوربت ده یاشاییردی یازیلیب دیر. بو حیسی شعرلری اوخویاندا اؤزوز دویا بیلرسیز. شعرلرین چوخو بغداد، باکی و مسکو شهرینده یازیلیبلار. قورشون کیمی قوربتده وطنسیزلیک آغیردیر واردیرمی وطن آیریغیلیندان دا بؤیوک غم ؟ قوربتده ایر گولسه دوداقلار، کؤنول آغلار سیما دا گولوش حوکم سورر، قلبده ماتم جنت کیمی ائولر تیکه قوربتده گر اینسان توی شنلییی تک کئچسه اونون دملری داییم گر اولسا دا سولطان باش ایسه ده هر امرینه عالم هر بیر طرفی اولسادا گولشن یوخ چاره، وطن دردی اونون قلبینی داغلار آیریلماز اونون کؤنلو عؤمورلوک وطنیندن آیریلسا، آدام آد وئرر بیلمز اونا ویجدان !! تورکجم منیم سس بایراغیم یازار : پروفسور محمد تقی زهتابی حاضیرلایان : اکبر رحیم زاد فرجی یایین ائوی : نباتی یاییم تاریخی : ۱۳۸۸ قیمت : ۵۰۰۰ تومن نوشته شده در معرفی کتاب | یک نظر » آذربایجانین هونرینین اوجو بوجاغی یوخدور. اسکی زامانلاردان ایندی یهدک اینسانلار اولوبلار کی بو چیراغین سؤنمه یینه ایذن وئرمه ییبلر. بو کیتاب ایسه آذربایجانین هونر تاریخینه بیر پنجره آچیر. کیتاب بو قونودا یازیلان کیتابین بیرینجی جیلدی دیر و آذربایجانین اسکی زامانلارداکی اینجه صنعتینه گؤره بحث ائدیر. کیتاب ریضایئو (صنعت شیناسلیق دوکتورو) ین قلمی له یازیلیبب نشر اولونموب و فاطمه میر حسین پور اونو عرب الیفباسینا کوچوروبدور. کیتابدا بحث اولونان تاریخ اسکی زامانلاردا ماغارالارین داشلارینین اوستونده چکیلن شکیل لردن باشلاییب، ماغارالاردا تاپیلانلارلا ایدامه تاپیب، سونرا دا تاریخ ایستیقامتینده ایره لی گئدیر. کیتابدا هر قونویا گؤره اؤزل شکیللر ده وار. بو شکیللرین بعضی لری ایلک دفعه دیر کی مطبوعاتیمیزدا بیر کیتابدا چاپ اولونور. کیتابین شامیل اولان جغرافیایی یئرلری آذربایجان و اونون اطراف یئرلری دیر. بدیعی شوشه ایشلری، قیزیلچیلیق، هئیکل دوزلتمه و حکاکلیق کیتابداکی بحث اولونموش هونرلردن دیر. آذربایجان اینجه صنعتی یازار : ن. ربضایئو کؤچورن : فاطمه میر حسین پور یایین ائوی : بوتا یاییم تاریخی : ۱۳۸۸ قیمت : ۲۵۰۰ تومن نوشته شده در معرفی کتاب | یک نظر » رسول یونانین فارسجا شعر و کیتابلاری داها چوخ معروف اولدوغونا رغمن تورکجه شعر و یازیلاری آذربایجان اوخوجولارینا او قدر ده تانینمیش دئییل. بونون بیر ندنی ده اونون کیتابلارینین تهران یایین ائولرینده چیخماسی اولا بیلر. بو بیر-ایکی ایلده یونانین نئچه فارسجا و تورکجه کیتابی ایشیق اوزو گؤروب. بو کیتاب رسول یونانین بیر سیرا تورکجه شعرلرینه عایید دیر. کیتاب اوچ بؤلوم دن دوزه لیب. «لیوان لارین موسیقی سی»، «سن میکه له نین بیر خوروزو وار» و «شارکی لار» بو اوچ بؤلومو اولوشدورور. ایلک بؤلوم سئوگی شعرلری، ایکینجی بؤلوم بیر آز آغیر شعرلر و سون بؤلوم آدیندان بللی اولدوغو کیمی شارقی لارا عایید دیر. بو بؤلوم باشقا ایکی بؤلومه تای مدرن شعر دئییل. بو کیتاب تورکجه شعر و ادبیات سئونلره بیر یئنی تجربه ساییلا بیلر. آتام یایدا اؤلوب اؤلوم ماوی ایدی پاییزدا اؤلدو لیلا اؤلوم ساری ایدی یاشار باهاردا اؤلدو اؤلوم یاشیل ایدی ایندی من بورجلویام بیر آغ اؤلومه
جاماکا یازار: رسول یونان یایین ائوی : امرود یاییم تاریخی: ۱۳۸۷ قیمت: ۱۰۰۰ تومن نوشته شده در معرفی کتاب | بدون نظر » قاجار زامانیندا، آذربایجان منطقه سینین هر منطقه دن اؤنمی چوخ ایدی. او زامانلار آذربایجان ولیعهدلرین یاشادیغی منطقه اولدوغونا گؤره بوتون ایران اوچون توتولان تصمیم لرین بعضی سی بو بؤلگه دن تهرانا گؤنده ریلردی. «آذربایجان ولیعهد نشین» کیتابی دا او زامانلاردان بحث ائدیر.«ابراهیم پورحسین»-ین یازدیغی کیتابلارین بیر فرقی باشقا کیتابلاردان، اونون کیتابلاریندا بول- بول دیرلی، تایسیز شکیل لرین یئر آلماسیدیر. اونون دا دلیلی «پور حسین»ین یاخشی شکیل کلکسیونونا صاحیب اولدوغودور. بو کیتابدا آذربایجانین قاجار دؤره سینه عایید سیاسی، اجتماعی، فرهنگی و تاریخ مسئله لریله ایلگیلی یازیلار واردیر. میثال اوچون شاه لارین خلعت گئیمه سی، شاه اولماغی، او زامانا عایید اولان ائولر، مراسیم لر، همده میللتین فرهنگی، مراسیم لری، پالتارلاری، بو کیتابین شیرین بحث لریندن دیلر.
آذربایجان ولیعهد نشین یازار: ابراهیم پورحسین یایین ائوی: شایسته یایین تاریخی: ۱۳۸۶ قیمت: ۳۰۰۰ تومن نوشته شده در معرفی کتاب | یک نظر » تبریز تاریخی حاقدا اوچونجو چاپا یئتیشن بیر کیتاب، اؤنملی کیتابلاردان حئسابا گله بیلر. بو کیتاب «تاریخ تبریز، از دوران باستان تا بر آمدن مغولان» دیر. سایین «مجید رضازاد عموزین الدین» بو کیتابین یازاری، چوخلو قایناقلاردان فایدالانیب، هر بؤلومو چوخ کامیل حالدا یازیب، آچیقلاییب. تبریزین جغرافیاسی ایله آدی حاقدا یازیلار وار و سونرا تبریزین تاریخی ایسلام زمانینا جا، ایسلام زمانیندان سلجوقلولار عصیرنه جه، سلجوقلولاردان اتابکان لاراجا، بو کیتابین بؤلومللرینین باشلیق لاری دیر. کیتابین ان جالیب بؤلوم لریندن، تبریزین آدینا گؤره اولان بحث لردیر. بو بحث لرده چوخلو قایناقلار وئریلیب و هامی سین بیر یئره ییغیبدیر. کیتابین سونوندا، بیر پارا شکیل لر، کیتابین بحث لرینه گؤره یئرله شیب. بو شکیل لردن بیری، «دؤرد میناره» اولان یئردیر کی درگینین کئچن ساییلارینین بیرینده اونا گؤره یازمیشدیق. دئمک لازیمدیر کی یازار بو کیتابی یازدیقدا ۲۱۹ قایناق دان فایدا لانیب دیر.
تاریخ تبریز، از دوران باستان تا برآمدن مغولان یازار: مجید زضازاد عموزین الدین یایین ائوی: اختر یایین تاریخی: اوچونجو چاپ - ۱۳۸۸ قیمت: ۳۰۰۰ تومن نوشته شده در معرفی کتاب | یک نظر »
لوطفن ایلک اؤنجه اؤزونوزو آرتیق تانیدین؟ یئتمیش ایل قاباق کلیبرین دیزمار ماحالیندا عاشورا گونو آنادان اولموشام. ائله بونا گؤره ده آدیمی «حسین» قویوبلار. بیر ایل اوردا دایی مین تشویقی ایله اوخولا گئتدیم. سونرا آذرین ۲۱ ینده تبریزه داشینیب «رازی» اوخولوندا تحصیله ادامه وئرمیشم. یادیما گلیر آت ایله تبریزه گلدیک. سامان میدانی باشدان باشا کروانسرا ایدی، آت لاری باغلایاردیلار اورا. طبیعی ریشته سینده درس اوخویوب ریاضی دیپلومو آلدیم، بیلیم یوردودا انگلیس دیلین اوخودوم، اما عشقیم ادبیات دیر. ۳۷ ایل سورهسینجه اؤیرتمن اولدوم، یئددی ایلین کندلرده و ۳۰ ایل «رازی» اوخولوندا. بونا دا چوخ فخر ائدیرم. تورک دیلینه چئویرمهیه، ندن پروین خانیمین شعر دیوانین سئچدینیز؟ ادبیاتا ماراغیم اولوبدور، دؤردونجو کیلاسی اوخویاندان شعر دئمیشم. اما پروینین شعرلرینه بویؤک عشقیم اولوب و سئومیشم. بو خانیمین شعرلرینده چاپلوسلوق گؤرهبیلمزسن، شعرین چؤرهیه ساتماییب. منده پول قازانماق اوچون کیتاب یازمامیشام. ایسته میشم بو خانیمین شعرلری ائولره گئتسین، حتی خرجین ده اؤزوم قویموشام. «آموزش و پرورش» ایداره سینه دئدیم: امتیاز سیزین اولسون پولویلا «رازی» اوخولوندا کیتابخانا دوزلدین، قبول ائتمه دیلر، بعضی ایشلر توفیق ایستر کی هر کسده اولماز! بو چئویرمهده گاهدان وزن سینیقلیغی گؤرونور، سیزجه سببی نه اولا بیلر؟ من پروینین شعرلرین بیت بیت چئویرمه میشم. پروینین شعرین اوخوموشام هر نه ایلهام اولوب، هر نه شعریندن دویموشام قلمه آلمیشام. داها شعری قالیبه دوزمه میشم. منجه بو اؤنملی دیر کی سؤزلر اورکدن چیخان اولوب. اعتصامی نین هانسی شعری نین هم تورکجه سین هم فارسجاسین بیهنیرسینیز؟ شعرلرینین هامیسی گؤزل دیر. شعرلری دیرلی دیر هامی نین یانیندا اوخویا بیلرسن اما «الماس و زرگر» آدلی شعرین چوخ سئورم. البته بوتون شعرلرین خوشلارام. بو ایش نه قدر زامان آپاریب؟ ایکی ایل چکدی بو کیتابی یازدیم. اؤیرتمن لیکدن بازنشست اولاندان آیری پئشه دالیسیجا گئتمه دیم، باشیمی ادبی ایشلره قاتمیشام. بو کیتابین میللت طرفیندن قارشیلانماسی یاخشی اولدومو؟ دئدیییم کیمی هئچ ناشیر ایله قراردادیم یوخدور. ساتمامیشام. تکجه ایکی یوز دنه سین یولداشلارا هدیه وئرمیشم. لوطفن باشقا ادبی ایش لرینیزدن دانیشین؟ فارس و تورک دیل لرینده شعرلریم اولوب. بعضی شعرلریم تبریز بیلیم یوردونون چیخاردیغی «تبریز و پیرامون» آدلی بیر مجموعه ده چاپ اولوب، بیرآزی دا «نغمه های تبریز» ده یاییملانیبدیر. «سنگام» آدلی بیر هند فیلمی وار کی فیلمی چوخ سئورم. ۱۹ دفعه باخمیشام! و بو فیلمی نظمه چکمیشم. «آنچه مردان باید بدانند» و «آنچه زنان باید بدانند» آدلی یازیلاریم وار کی شعر قالیبینده یازمیشام. «ملانصرالدین»-ین حیکایه لرین باشلادیم نظمه چکم ۱۰ دنهسین یازدیم قالانی هله قالیب. گله جکده نه ایشلر گؤرمک ایستهییر سینیز؟ قصدیم وار نیظامی نین دیوانین تورک دیلینه چئویرم و توفیق اولسا ملانصرالدین مجموعه سینین آردین یازام. یاشاییشدان ایسته یینیز نه دیر؟ رازی اوخولوندا بیر سالون یا کیتابخانا ووراماق ایسته ییرم. البته مسئول لار سؤز وئریرلر آما دالیسی گلمیر. بیلدییینیز کیمی بو منطقه محروم قالیبدیر و بو قشره خیدمت ائله مک سعادت دیر، فعلن بورا جان آرزیما چاتمامیشام. بو اوخولون بعضی شاگیردلرینین یوخاری مقاما چاتماسی سئویندیریجی دیر، دوکتور پهلوان زاده، جواد پسیان، دوکتور پاژنگ، پروفئسور موسوی، سرهنگ جهانگیری اؤز شاگیردلریم اولوبلار. و سون اولاراق بیر خاطیره نیزی بویورون؟ اؤیرتمن لیک زامانی خاطیره ایله دولودور. منی بازنشست ائله یه نی حلال ائلهمهرم، ایندی ده گئدیب درس وئرهرم! یادیما گلیر کیلاسلارین یاریسین اوشاقلارین دردینه یئتیشردیم؛ نییه یوبانیسان؟ نیه حالسیزسان؟ شاگیرد لریمین چوخو باشماقچی ایدیلر. بیر ساعات تئز یولا سالاردیم گئدیب ایشلرینه یئتیشه لر. اما بیر خاطیرهم وار هئچ زامان یادیمدان چیخماز، کندلرین بیرینده درس وئریردیم، انشاء کیلاسیندا موضوع اولاراق دئمیشدیم یازسینلار؛ «آتامیزا گؤره وظیفه میز نه دیر؟» اوشاقلارین بیرینه دئدیم یازدیقلاریوی اوخو، تاسفله یازمامیشدی. سوروشدوم نییه یازماییبسان؟ دئدی: آخی بیر موضوع دئییبسن کی یازانمادیم، آنادان اولاندان آتامی گؤرمه میشم، آتا محبتی دویمامیشام. نییه بو ایشی گؤردویومه چوخ کدرلندیم. اوشاق اینجیمیشدی. او زامان دان انشاء کیلاسلاریندان آجیغییم گلر. ایندی ده او گون یادیما دوشنده کدرله نه رم.
مصاحبه آپاران : شیوا حاجی محمدی
نویسنده : حسین پسیان تعداد صفحه : ۲۰۴ زبان : تورکی آذربایجانی تاریخ انتشار : ۱۳۸۵ قیمت : ۴۰۰۰ تومان نوشته شده در با نویسنده , معرفی کتاب | یک نظر » |
