نویسنده: admin در ۱۴ فروردین , ۱۳۸۹
حسین پسیان جنابلاری، رحمتلیک کلنل پسیان عائله سی نین عضولریندن بیریدیر و بیر دیرلی ایش ایله آذربایجانین بؤیوک شاعیره سی پروین خانیم اعتصامی نین شعر دیوانین تورک دیلینه ترجمه ائتمیشلر. اوخویاجاغینیز مصاحبه بو کیتاب و یازاری نین حاققیندا اولان سؤز صحبتلردیر.
لوطفن ایلک اؤنجه اؤزونوزو آرتیق تانیدین؟
یئتمیش ایل قاباق کلیبرین دیزمار ماحالیندا عاشورا گونو آنادان اولموشام. ائله بونا گؤره ده آدیمی «حسین» قویوبلار. بیر ایل اوردا دایی مین تشویقی ایله اوخولا گئتدیم. سونرا آذرین ۲۱ ینده تبریزه داشینیب «رازی» اوخولوندا تحصیله ادامه وئرمیشم. یادیما گلیر آت ایله تبریزه گلدیک. سامان میدانی باشدان باشا کروانسرا ایدی، آت لاری باغلایاردیلار اورا. طبیعی ریشته سینده درس اوخویوب ریاضی دیپلومو آلدیم، بیلیم یوردودا انگلیس دیلین اوخودوم، اما عشقیم ادبیات دیر. ۳۷ ایل سورهسینجه اؤیرتمن اولدوم، یئددی ایلین کندلرده و ۳۰ ایل «رازی» اوخولوندا. بونا دا چوخ فخر ائدیرم.
تورک دیلینه چئویرمهیه، ندن پروین خانیمین شعر دیوانین سئچدینیز؟
ادبیاتا ماراغیم اولوبدور، دؤردونجو کیلاسی اوخویاندان شعر دئمیشم. اما پروینین شعرلرینه بویؤک عشقیم اولوب و سئومیشم. بو خانیمین شعرلرینده چاپلوسلوق گؤرهبیلمزسن، شعرین چؤرهیه ساتماییب. منده پول قازانماق اوچون کیتاب یازمامیشام. ایسته میشم بو خانیمین شعرلری ائولره گئتسین، حتی خرجین ده اؤزوم قویموشام. «آموزش و پرورش» ایداره سینه دئدیم: امتیاز سیزین اولسون پولویلا «رازی» اوخولوندا کیتابخانا دوزلدین، قبول ائتمه دیلر، بعضی ایشلر توفیق ایستر کی هر کسده اولماز!
بو چئویرمهده گاهدان وزن سینیقلیغی گؤرونور، سیزجه سببی نه اولا بیلر؟
من پروینین شعرلرین بیت بیت چئویرمه میشم. پروینین شعرین اوخوموشام هر نه ایلهام اولوب، هر نه شعریندن دویموشام قلمه آلمیشام. داها شعری قالیبه دوزمه میشم. منجه بو اؤنملی دیر کی سؤزلر اورکدن چیخان اولوب.
اعتصامی نین هانسی شعری نین هم تورکجه سین هم فارسجاسین بیهنیرسینیز؟
شعرلرینین هامیسی گؤزل دیر. شعرلری دیرلی دیر هامی نین یانیندا اوخویا بیلرسن اما «الماس و زرگر» آدلی شعرین چوخ سئورم. البته بوتون شعرلرین خوشلارام.
بو ایش نه قدر زامان آپاریب؟
ایکی ایل چکدی بو کیتابی یازدیم. اؤیرتمن لیکدن بازنشست اولاندان آیری پئشه دالیسیجا گئتمه دیم، باشیمی ادبی ایشلره قاتمیشام.
بو کیتابین میللت طرفیندن قارشیلانماسی یاخشی اولدومو؟
دئدیییم کیمی هئچ ناشیر ایله قراردادیم یوخدور. ساتمامیشام. تکجه ایکی یوز دنه سین یولداشلارا هدیه وئرمیشم.
لوطفن باشقا ادبی ایش لرینیزدن دانیشین؟
فارس و تورک دیل لرینده شعرلریم اولوب. بعضی شعرلریم تبریز بیلیم یوردونون چیخاردیغی «تبریز و پیرامون» آدلی بیر مجموعه ده چاپ اولوب، بیرآزی دا «نغمه های تبریز» ده یاییملانیبدیر. «سنگام» آدلی بیر هند فیلمی وار کی فیلمی چوخ سئورم. ۱۹ دفعه باخمیشام! و بو فیلمی نظمه چکمیشم.
«آنچه مردان باید بدانند» و «آنچه زنان باید بدانند» آدلی یازیلاریم وار کی شعر قالیبینده یازمیشام. «ملانصرالدین»-ین حیکایه لرین باشلادیم نظمه چکم ۱۰ دنهسین یازدیم قالانی هله قالیب.
گله جکده نه ایشلر گؤرمک ایستهییر سینیز؟
قصدیم وار نیظامی نین دیوانین تورک دیلینه چئویرم و توفیق اولسا ملانصرالدین مجموعه سینین آردین یازام.
یاشاییشدان ایسته یینیز نه دیر؟
رازی اوخولوندا بیر سالون یا کیتابخانا ووراماق ایسته ییرم. البته مسئول لار سؤز وئریرلر آما دالیسی گلمیر. بیلدییینیز کیمی بو منطقه محروم قالیبدیر و بو قشره خیدمت ائله مک سعادت دیر، فعلن بورا جان آرزیما چاتمامیشام. بو اوخولون بعضی شاگیردلرینین یوخاری مقاما چاتماسی سئویندیریجی دیر، دوکتور پهلوان زاده، جواد پسیان، دوکتور پاژنگ، پروفئسور موسوی، سرهنگ جهانگیری اؤز شاگیردلریم اولوبلار.
و سون اولاراق بیر خاطیره نیزی بویورون؟
اؤیرتمن لیک زامانی خاطیره ایله دولودور. منی بازنشست ائله یه نی حلال ائلهمهرم، ایندی ده گئدیب درس وئرهرم! یادیما گلیر کیلاسلارین یاریسین اوشاقلارین دردینه یئتیشردیم؛ نییه یوبانیسان؟ نیه حالسیزسان؟ شاگیرد لریمین چوخو باشماقچی ایدیلر. بیر ساعات تئز یولا سالاردیم گئدیب ایشلرینه یئتیشه لر. اما بیر خاطیرهم وار هئچ زامان یادیمدان چیخماز، کندلرین بیرینده درس وئریردیم، انشاء کیلاسیندا موضوع اولاراق دئمیشدیم یازسینلار؛ «آتامیزا گؤره وظیفه میز نه دیر؟» اوشاقلارین بیرینه دئدیم یازدیقلاریوی اوخو، تاسفله یازمامیشدی. سوروشدوم نییه یازماییبسان؟ دئدی: آخی بیر موضوع دئییبسن کی یازانمادیم، آنادان اولاندان آتامی گؤرمه میشم، آتا محبتی دویمامیشام. نییه بو ایشی گؤردویومه چوخ کدرلندیم. اوشاق اینجیمیشدی. او زامان دان انشاء کیلاسلاریندان آجیغییم گلر. ایندی ده او گون یادیما دوشنده کدرله نه رم.
کیتابین شعرلریندن بیر اؤرنک
ایینه نین دردی دئشیلدی، دئدی خیاطه بئله
آخشام اولدو نه قدر ایشله یه جک سن، سن هله
گئجه گوندوز ووروسان هئی منی سن، بیزلی ییسن
گونده یوز یول قانادیب، بیر دفعه اوف اوف دئمیسن
قانا باتدیم دئمه دین فلسفه سین یارماغیوی
بویا دین قانه منی، هم ده کی اؤز بارماغیوی
بیر دئمیرسن کی اوزون ساپ منی دالدان قووالیر
بعضی وقت من گئدیرم، ساپ قیریلیر یولدا قالیر
باشیم اوسته گئدیرم، دالدان هئی اوسگوهدو وورور
بزیرم لوت گزیرم، سینه ده قلبیم توتولور
درزی حیرصلندی دئدی تعریف ائدیرسن اؤزونو
خالق بیر جوت گؤزونن یاخشی گؤرور دار گؤزونو
سنلی منلی نه قدر یاخشی دی بیر لحظه گئدک
داغیلان قلب لره هیممت ائدیب روفه ائدک
چاغیراق پئسیان ایر تیکمه لی واردیر اوره یین
تیکک اما ائله بیل گؤیده قیریلدیر اله یین
مصاحبه آپاران : شیوا حاجی محمدی
نویسنده : حسین پسیان
تعداد صفحه : ۲۰۴
زبان : تورکی آذربایجانی
تاریخ انتشار : ۱۳۸۵
قیمت : ۴۰۰۰ تومان
خرید اینترنتی این کتاب
نوشته شده در با نویسنده , معرفی کتاب | یک نظر »
